BUTUAN CITY – Pursigido ang pamilya Villamor nga kasuhan ang gwardiyang mipusil-patay sa ka-ubanan og pare pa niini kagabii, gamit ang shotgun hinungdan nga kutob lang sa adlaw sa mga santos ang iyang kinabuhi.
Naila ang biktimang si Rey Perez-Villamor, 34-anyos kinsa gipusil sa ulo hinungdan sa iyang hinanaling kamatayon samtang ang suspek nailang si Michael Lascaña, residente sa Purok Sari-Sari, Brgy. Golden Ribbon ning siyudad og mitahan gilayon sa kagawad sa ilang barangay.
Sigon sa asawa sa biktimang si Luciana, posibleng nagkabikil na usab ang duha sa oras sa ilang pagrelibo samtang naka-duty sa usa ka establisamiento sa may Brgy. Port Poyohon ning siyudad.
Gi-asuy pa sa ginang nga ning mi-aging buwan, gibaharan na ang suspek sa ilang amo nga hunungon na ang pag-duty nga hubog nga maoy rason nga makabikil sila sa biktima tungod sa kalangay na sa pag-report niini sa iyang duty.
Gitu-uhan sa ginang nga hayan mao na usab kini ang gikabiklan sa duha kagabii ilabina nga hubog na usab nga nag-duty si Lascaña nga posibleng maoy hinungdan nga misangpot kini sa pagpamusil. (Beth Ruiz)
