BUTUAN CITY – Nibati ug dili ti-aw nga kahadlok ang mga residente sa Barangay San Pedro, Surigao City sakop sa Surigao Del Sur human sa insedenteng pagpang-guba sa 17 ka pantiyon diha sa menteryo nga gikuhaan ug tuway-tuway.
Sa eksklusibong pakighinabi sa Bombo Radyo Butuan kang Jane Catuburan, mahadlok na sila nga managkot ning adlaw sa mga patay sa pagtoong nasuko ang mga tag-iya sa mga lawas nga gikuhaan ug tuway-tuway.
Saysay pa ni Catuburan, nagsusi lang ang iyang ig-agaw kung kinsa ang nagkuha ug balas sa ilang dapit ug sa pag-agi sa menteryo, nakita niini nga dunay pantiyon nga na-bangag hinungdang misulod siya ug didto nasuta nga daghang mga pantiyon pa ang gipang-guba.
Gipangkuha matud pa ang gikan sa tuhod ngadto sa lapa-lapa sa mga minatay apan ang 6 ka bulan nga nalubong, gikuha ang tanang bukog niini.
Lakip sa mga nakapahadlok kanila mao ang wala pa pagtabon sa gipang-guba nga pantiyon.
Base matud pa sa estorya sa usa ka tambalan, anting-anting matud pa ang gikuhang mga tuway-tuway diin dunay taga- Sequejor nga mopalit niini.
Samtang nagtoo si Catuburan nga dayu ang nagbuhat sa ingon ilabina kay halos manag-paryente lang silang namuyo sa maong barangay.
Gibutyag usab niini nga duna nay misusi nga kapulisan sa maong dapit apan wala na kini mibalik pa. Sa karun, nag-request na ang Barangay Kapitan aron mobantay sa maong sam-ang ilabina kay nahadlok na usab ang mga Barangay Tanod.
Kini tungod sa pagtoo nga mobalik pa ang mga responsible ilabina kay dunay gisugdan na sila ug tib-tib apan wala pa nabangag.
Bisan paman niini, giklaro ni Jane nga managkot gihapon siya karung petsa dos apan magpauban lang siya sa iyang bana ug mga anak.
