BUTUAN CITY – Sa pangindahay nga subling makita ang dugay nang nabuwag kaniyang igsoon, midangop dinhi sa Bombo Radyo Butuan si Nestor Suarez, taga-Sara, Iloilo.
Sa eksklusibong pakighinabi ning sibyahan, gibutyag ni Nestor nga 49-anyos na karon ang iyang igsoong si Noli Suarez sukad kini nibiya sa ilang lugar niadto pang dekada 80 aron mu-anhi dinhi sa Mindanao.
Wala matud pa’y gihatag nga lugar kung asa sa Mindanao kini mupadulong hinungdan nga nanghinaut siyang pinaagi sa pagdangop sa Bombo Radyo, iyang makita ang iyang gikamingawan na og maayo nga manghod.
Base sa iyang madumduman, nag-edad pa lang kaniadto og 14-anyos ang iyang igsoon kinsa makamaong mu-drive og sakyanan og makamaong magluto.
Subay niini, nanawagan siya sa iyang igsoon og sa tanang naka-ila niini nga isulti kaniyang dugay na nila ning gipangita.
Idangop lang matud pa dinhi sa Bombo Radyo Butuan ang makahatag og impormasyon kalabot kang Noli Suarez aron ma-contact gilayon siya.
