BUTUAN CITY – Gipa-abot pa sa kadumalahan sa Philippine Drug Enforcement Agency kon PDEA-Caraga ang guidelines sa memorandum nga gipagawas ni Pangulong Rodrigo Duterte alang sa pagpanguna nila mas gipakusgang kampanya sa administrasyong Duterte batuk sa ginadiling druga.
Gibutyag ni Dindo Abellanosa – information officer sa maong rehiyunal nga ahensya, pinaagi sa guidelines, magiyahan sila sa angayang buhaton ilabina sa tahas nga himuon ilabina kadtong natahas kaniadto sa ilang mga ka-abag nga law enforcement agencies sama sa kapulisan.
Pinaagi matud pa niini, matun-an nila ang epektibong pagpatuman sa mga anti-illegal drugs operations ilabina nga kulang sila karon og mga personahe.
Gipasabot pa sa opisyal nga duna sila’y mga saktong gamit og mga tawong mupatuman sa himuong mga operasyon apan ang iyang gikabalak-an nga dili nila mahurot og cover sa mga operasyon ang entiro rehiyon tungod sa kagamay lang sa ilang mga personahe.
Aminado ang opisyal nga tungod sa kamanduan sa pangulo, apektado na ang ilang nakahan -ay na daang mga programa nga gikatakda unta nilang ilusad uban ang kapulisan, mga personahe sa Department of Health og mga opisyal sa lokal nga kagamhanan. (Beth Ruiz)
