BUTUAN CITY – Gidala na sa balay-tambalanan ang usa ka lalaking kulang sa pangisip human na-rescue gikan sa pagpuyo niya sa taas nga bahin sa punuan sa lubi sulod sa halos tulo ka tuig sa ilang lugar sa La Paz, Agusan del Sur.
Kini human gisanong sa lokal nga kagamhanan ang hangyo sa pamilya Sanchez nga tabangan silang mapakanaog gikan sa maong punuan si Gilbert Sanchez tungod sa hait nga hinagibang iyang gihuptan nga mas naghatag og delikado sa iyang kinabuhi.
Gigamitan sa mga rescuers og chainsaw ang ilang gihimong operasyon human napabalhin sa gitungod nga long-armed backhoe ang maong lalaki nga gisabayan pa og pukot sa ubos nga bahin aron masegurong masawo kini higayong mu-ambak gikan sa iyang nahimutangan.
Mahinumdumang gibiyaan ni Sanchez ang balay nga gipuy-an nila sa iyang pamilya sa Brgy. Villa Paz niadtong Disyembre 2014 human na-trauma dihang gihapak og armas ang iyang ulo nga maoy hinungdan sa kanunay na niining pagpuyo ibabaw sa punuan sa lubi.
Hatdan siya og pagkaon gamit ang basket nga gikabit sa pisi kansa gikabit usab sa usa sa mga palwa sa taas nga bahin.
Human napabalhin sa backhoe, daling giputol ang punuan sa lubi gamit ang chainsaw. (Beth Ruiz)
