-- ADVERTISEMENT --
BUTUAN CITY – Wala damha sa pamilya Orcejola nga ang binuhing kabaw ra ang mukutlo sa kinabuhi sa mag-uumang si Ulysses Cawale Orgejola, 28-anyos, residente sa Brgy. Serna sakop sa Surigao City.
Base sa asuy sa ka-ubanang mag-uumang nakasaksi sa maong hitabo ngadto kang PO3 Cesar Johans Orcejola, pasado alas-7:30 sa buntag gipadaro sa biktima ang iyang kabaw sa ilang basakan dihang kalit lang niining gisungag si Orcejola sa bitiis og paa.
Migawas sa imbestigasyon nga na-igo sa sungay sa kabaw ang pantog sa biktima hinungdan nga wala na kini matabang pa pag-abot sa ospital.
Wala pa masuta ang hinungdan sa pagmaoy sa kabaw nga misangpot sa pag-unay niya og sungag sa iyang amo. (Beth Ruiz)
