BUTUAN CITY – Gibana-banang 5-mil ka mga indibidwal ang musalmot sa himuong panagtigom karong Sabado, Oktubre 14 sa may FSUU gym subay na sa usa ka gatus ka tuig nga pagsa-ulog sa milagrong nahitabo didto sa Portugal.
Kini may kalabutan na sa pagpakita ni Birheng Maria Fatima ngadto sa tulo ka mga bata aron ipanawagan ang pagbag-o sa katawhan, apil na niini ang pagbiya sa mga sala ingon man ang kanunay nga pag-ampo aron kanunay nga mupatigbabaw ang kalinaw sa tibuok kalibutan.
Gawas niini, sa-ulugon usab sa maong adlaw ang ika-50 nga anibersaryo sa tibuok kalibutan sa kamugnaan sa Catholic Charismatic Renewal Movement kon CCRM apil na ang golden anniversary usab sa kamugnaan sa diocese sa Butuan og sa communion of communities sa tibuok Pilipinas.
Sa susamang adlaw usab, sa-ulugon sa susamang adlaw ang ika-420 ka tuig nga kasumaraan sa katukuran sa unang simbahang Katoliko ning pulo sa Mindanao nga nahimutang sa Brgy. Banza.
Sigon ni Fr. Clase, gipahinungod ang maong simbahan ngadto kang Birheng Maria hinungdan nga angayan matud pang dili palabyon ang himuong panagtigom karong Sabado.
Alayon niini, nanawagan si Fr. Clase ngadto tanang mga tumutuo sa simbahang Kaatoliko nga mupahinungod og hini-usang pag-ampo ilabina alang sa Caraga Region. (Beth Ruiz)
