BUTUAN CITY – Planong muadtu sa Surigao Del Norte ang taga-Malacañang press aron mag-imbestiga mahitungod sa pagpangdagmal sa vice mayor sa lungsod sa Dapa, ngadto sa usa ka media practitioner.
Kini mismo ang gipaabot nga impormasyon ni Ed Mapayo, usa ka reporter, anchorman ug editor-in-chief sa usa ka mantalaan sa Ssurigao area, kansa nabiktima sa pagpangdagmal ni Vice mayor Francisco Matugas Gonzales niadtong Septembre 23 ning tuiga.
Sigon ni Ed Mapayo, hingpit nang napasaka nila ang kaso batuk sa opisyal ngadto sa Ombudsman Mindanao ug gihatagan na nila ug complaint letter ang Office of the President, Malacañan Press Corps ug Department of Interior and local government kon DILG.
Gipaneguro pa sa tigbalita nga mahatagan ug hustisya ang gihimung pagpangdagmal sa bise mayor ngadto kaniya aron dili basta-basta nalang abusuhon ang media sa mga tawong naghupot sa renda sa panggamhanan.
Nahitabo ang maong insedente dihang nagkita sila sa usa ka kalihukan sa lungsod sa Pilar gumikan sa gipagawas niining artikulo mahitungod sa opisyal nga nagsugo sa pulis nga bahugan ang iyang manok pangtari. (Rolan Janea)
