BUTUAN CITY – Gihuman na sa mga trabahante sa Surigao City port ang ilang 43-ka adlaw nga strike human nga gipirmahan ang operating contract sa ilang employer ngadto sa Philippine Ports Authority kon PPA nga nag-terminate na niadtong October 6 ning tuiga.
Mahinumdumang muabot sa 102 ka mga sakop sa Surigao Dock Workers Union kon SDWU ang nagdeklara ug strike niadtong August 24 human nga wala gituman sa Prudential Customs Brokerage Services Inc. (PCBSI) ang ilang gikasabotan sa ilang Collective Bargaining Agreement kon CBA, ilabina ang kapakyas niini sa pagpataas sa ilang suhulan.
Sigon ni union leader Artiquio Alciso, human na-terminate ang walo ka tuig nga kontrata sa PCBSI, wala na matud pa’y angayang i-protesta tungod kay technically wala na sila’y legal relationship ngadto sa maong operator.
Subay niini, ang PPA na una ang mu-take over sa mga port operations hangtud nga makapangita ug laing cargo handling operator sa maong pantalan.
Kuhaon usab ug balik ang serbisyo sa mga dock workers isip mga temporary workers hangtud nga aduna na’y bag-ong operator nga magpadayon sa maong mga operasyon .
Samtang gibutyag usab ni kanhi Surigao City councilor Jose Begil Jr., legal counsel sa unyon, aduna pa gihapo’y legal obligation ang PCBSI pag-settle sa separation pay ug uban pang benefits sa mga dock workers.
Gibutyag usab ni Herminigildo. Daytoc, provincial director sa Department of Labor and Employment kon DOLE-Surigao del Norte, ilang i-request ngadto sa PCBSI ang pag-release sa separation pay sa mga trabahante sa labing daling panahon. (Mon Aplaya)
