BUTUAN CITY – Daw Semana Santa matud pa karon ang palibot sa Las Vegas tungod sa kamingaw sa maong lugar human ang mass shooting nga gikamatay sa 59 ka mga tawo.
Kini ang paghulagway ni Cathy Tobes, taga-Brgy. Ong Yiu ning siyudad sa Butuan nga kanhi presidente sa Kapisanan ng mga Brodkaster ng Pilipinas kon KBP-Butuan City chapter og karon kapin sa ka tuig nang nagpuyo sa Las Vegas Nevada.
Sa eksklusibong pakighinabi sa Bombo Radyo Butuan, gipadayag ni Tobes nga wala na kaayo’y nagtikaw-tikaw karon sa maong lugar tungod kay ang mga sakyanan gipang-reroute man human gisira ang kinatibuk-ang Boulevard Street tungod sa nagpadayong imbestigasyon sa mga otoridad.
Gidugang pa ni Tobes nga nanawagan karon si Las Vegas Mayor Carolyn Goodman sa tanang katawhan nga mudonar na sa ilang dugo aron ma-abuno ngadto sa mga nanginahanglan ilabina nga sa kapin 500 ka mga na-angol, daghan ang kinahanglang abunuhan og dugo.
Gawas niini, gipa-standby usab ang tanang nanarbaho sa medical services aron makaresponde gilayon higayong ipatawag na kung magkuha og medical staff ang mga ospital tungod sa kadaghan sa mga na-angol. (Beth Ruiz)
