BUTUAN CITY – Giplano karon sa hawanan sa Sangguniang Panglungsod ning syudad sa Butuan ang paghatag ug pasidungog ngadto kang Lance Busa human kini midaog sa usa ka international singing competition didto sa Malaysia.
Sa pakighinabi ning sibyahan, gibutyag ni City Councilor Ferdie Nalcot, nga usa sa ilang na-aprubahang resolusyon kagahapong adlawa atol sa gipahigayong regular session sa hawanan sa Sangguniang Panglungsod nga maghatag ug pag-ila sa mga nakab-ot sa nasangpit nga Butuanon didto sa gawas sa nasud.
Kini tungod na kay tataw nga nakahatag kini ug garbo dili lamang sa syudad sa Butuan apan lakip na sa tibuok nasud.
Lakip nga giplanuhan sa mga opisyal ning syudad ang paghatag ug cash incentives ngadto sa maong Butuanon singer ingon man tribute ilabina nga lauman pa ang mga pagpasundayag niini didto sa kauluhan.
Gani usa matud pa siya sa mga gikatahong mu-perform sa concert ni Michael Bolton didto sa kauluhan.
Subay niini, gisugyot ni Konsehal Nalcot ngadto na sa iyang mga kaubanang magbabalaod ning syudad nga magpapasar na ug ordinansa nga maghatag ug tabang pinansyal ngadto sa mga Butuanon nga mulambigit sa mga international competitions.
Tumong niini nga sa pagsugod pa lang sa ilang paningkamot, mahatagan gilayon sila ug ayuda ilabina sa pinansyal nga aspeto. (Beth Ruiz)
