BUTUAN CITY – Misaad si Butuan City Councilor Cromwel Nortega nga imbestigahan ang lakang nga gihimo sa City Tourism Office dihang giduol matud pa kanila ang handler ni Mary Fern de la Peña, nga garbo og representante ning siyudad sa mi-aging Miss Philippines 2017.
Nasayrang bisan og wala masulod sa top 15 sa online voting si de la Peña aron mu-abante sa semi-final round, gikoronahan gihapon kini isip Miss Philippines Quincentenario 2017 atol sa coronation night niadtong Sabado sa gabii sa The Tent sa Manila Hotel.
Sa eksklusibong pakighinabi naing sibyahan, gipadayag ni Konsehal Nortega nga base sa iyang nasayran, midangop sa City Administrator’s Office ang handler ni de la Peña kinsa gitunol usab ngadto sa City Tourism Office hangtud nga naka-abot na lang kaniya ang impormasyong bisan gown, wala’y na-abag ang maong buhatan hinungdan nga nadam ay ang lokal nga kagamhanan.
Pagsulod matud pa sa maong hisgutanan sa Sangguniang Panlungsod, mupahigayon gilayon og pagdungog ang Committee on Tourism aron mapatawag ang tanang hingtungdang ahensya sama sa City Tourism apil na mismo si dela Peña og ang iyang handler.
Pinaagi niini, masuta ang tinuod nga dagan sa panghitabo ilabina ang rason nganong wala kini matunuli og gikinahanglan niyang ayuda.
Samtang dili usab uyon si Konsehal Nortega nga ibasol sa city government ang wala pagsulod ni de la Peña sa Top 15 dungan sa pagpahinumdom sa tanang Butuanong concern nga beauty and brain ang iyang gi-apilang pageant kondiin siya ang duna’y dakong kabahinan sa pagsakmit sa dungog nga gusto niining makuha. (Beth Ruiz)
