BUTUAN CITY – Malampusong nasikop og balik sa Special Weapons And Tactics kon SWAT Team sa Butuan City Public Safety Company ang tulo ka mga pinirisong mi-eskapo gikan sa temporary custodial center sa Butuan City Police Station 3.
Kini ang gikumpirma ni P/Chief Insp, Johannes Castro – station commander sa Butuan City Police Station 2, human ang subsob nilang pakig-alayon sa ubang mga police units uban sa Kitcharao Municipal Police Station sa Agusan del Norte.
Sa pakighinabi ning sibyahan, gibutyag ni Insp. Castro nga ila gilayong gi-istorya ang pamilya sa tulo ka mga eskapo kagahapon og gihangyong pabalikon na sa ilang police unit aron dili madugangan ang kasong ilang gi -atubang.
Gawas niini, ila na usab nga gisuhid ang mga kabanay nga posibleng duulan sa maong mga eskapo kansa dali gilayon nilang gipabutangan og mga informers.
Migawas sa nakuha nilang impormasyon nga gikan sa pagsibat, nag-iyahay na pagpangkagiw sila Melien Mac Roxas Dumaplin, Ernesto Montoya og Dingdong del Rosario kinsa nag-atubang og nagkada-iyang kaso apil na ang paglapas sa Dangerous Drugs Act of 2002.
Posible matud pang nagkasabot sila nga magtapok sa usa ka barangay sa lungsod sa Kitcharao higayong makakita og kwarta, resulta sa ilang pagkasikop kagahapon sa alas-dies sa buntag.
Gitun-an pa nila ang sunod nga lakang nga himuon batuk sa mga eskapo sama sa posibleng pagpasaka kanila og laing kaso ilabina nga duna sila’y gipangdaut nga pasilidad sa kagamhanan. Posibleng ibutang una sa karsel sa Butuan City Police Station 1 ang mga eskapo tungod kay gi-ayo pa ang ilang temporayong custodial facility. (Beth Ruiz)
