BUTUAN CITY – Narekober sa kasundaluhan gikan sa duha ka mga napatay’ng rebeldeng New People’s Army kon NPA ang usa ka back pack nga duna’y mga uniporme, mga subersibong dokumento og mga buhing bala sa kalibre punto-45 nga pistola.
Kini human ang ilang engkwentro ning mi-aging hapon nga gikamatay usab sa usa ka membro sa Citizen Armed Forces Geographical Unit kon CAFGU.
Natigayon ang engkwentro human gisulong sa mga armadong rebelde ang ang CAFGU Active Auxiliaries kon CAA Salang detachment duol sa utlanan sa amihanan og habagatang rehiyon sa Mindanao.
Sigon ni Capt. Rhyan Batchar, spokesperson sa Southern Mindanao 10th Infantry ‘Agila’ Division, gigukod pa sa combat maneuvering troops sa 39th Infantry Battallion ang mga rebelde nga mipadulong sa utlanan sa northern og southern Mindanao regions.
Narekober ang patay’ng lawas sa mga rebelde sa migukod nga tropa sa 39th IB kagahapon sa buntag.
Naila ang namatay’ng CAFGU member nga si Joel Batawan samtang angol usab si CAA Jonathan Lasoy, samtang padayon pang gi-ila ang duha ka mga rebelde. (Beth Ruiz)
