BUTUAN CITY – Nagpadayon pa ang gihimong imbestigasyon sa mga sakop sa Lingig – Bureau of Fire Protection kon BFP human nahitabo ang usa ka sunog kagahapon sa kadlawon.
Sa pakighinabi ning sibyahan, gibutyag ni SFO2 Renato Pontillo sa Lingig – BFP, nga nagsugod matud pa ang nasangpit nga sunog bandang alas- 12:50 ang takna sa kadlawon sa panimalay ni Alma Daluzo, residente sa Poblacion, Lingig, Surigao del Sur.
Sigon niini, nga muabot matud pa sa 3rd alarm ang maong sunog kungdiin lakip nga nakaabot alang sa pagresponde ang firetruck gikan sa Barobo, Surigao del Sur.
Muabot matud pa sa 20 ka panimalay ug commercial establishment ang nalakip nga masunog sa halos duha ka oras nga pagdilaab sa kalayo adiser kini hingpit nga nakontrola.
Hinuon , wala matud pa’y natala nga casualty subay sa nasangpit nga panghitabo. Sa karon, wala pa matumbok sa mga kabomberohan kung unsa ang hinungdan sa maong sunog.
Subay niini, mukabat sa gibanabanang 1.5 – milyones pesos ang kantidad sa damyos sa maong sunog. (Beth Ruiz)
