BUTUAN CITY – Nagpadayon karon ang hot pursuit operation sa mga sakop sa Butuan City Police Station kon BCPS-3 batuk sa tulo nila ka mga piniriso nga nabantayang mi-eskapo kaganinang alas-sais sa sayong buntag.
Naila ang mga eskapo nga sila Melien Mac Roxas Dumaplin, Ernesto Montoya og Dingdong del Rosario kinsa nag-atubang og nagkada-iyang kaso apil na ang paglapas sa Dangerous Drugs Act of 2002.
Sigon ni P/Chief Insp. Johannes Castro, migawas sa inisyal nga imbestigasyon nga anaa pa sa ilang selda ang mga piniriso dihang gisusi pa sa guard-on-duty nga si PO3 Frederick Beba kaganinang alas-tres sa kaadlawon.
Dako na lang ang iyang kakurat dihang wala na ang tulo sa iyang pagbalik og susi pasado alas-sais sa buntag kondiin narekober ang nabiling nga 6.5-pulgadas nga gabas nga maoy gigamit pagputol sa kabilya sa bintana sa ilang selda.
Dugang pa ni Insp. Castro nga ila nang gipahibalo ang kabanay sa mga eskapo aron agnihon silang mubalik na sa prisuhan sa ingon dili madugangan ang kasong ilang gi-atubang. (Beth Ruiz)
