BUTUAN CITY – Planong maghimu ug resolusyon si Barangay Kapitan Juvy Ignacio Delgado sa Barangay Golden Ribbon, ning siyudad sa Butuan aron hingpit nga materminate ang ilang suspendidong kagawad nga nasikop sa anti-illegal drugs operation.
Sa eksklusibong pakighinabi ning sibyahan kang Barangay Kapitan Delgado, gipadayag niini ang hilabihang kalipay sa pagkasikop kang Karlan Louie Vallecer alias “Louie”, 48-anyos, menyu ug resident sa Purok Sari-sari B. Brgy. Golden Ribbon, Butuan City ug usa ka suspendidong barangay kagawad.
Sumala pa sa kapitan, kinahanglang ma-terminate ang maong kagawad tungod kay makadaot kini sa imahe sa barangay.
Base matud pa sa ilang monitoring nagpadayon sa ginadiling buhat ang maong suspek rason nga gipaningkamotan niyang masakpan ang suspek sulod ning bulana.
Mapasalamaton nalang si Kapitan Delgado sa mga personahe sa Philippine Drug Enforcement Agency kon PDEA-Caraga nga naka-aresto sa maong suspetsado.
Alayon niini, mi-awhag ang kapitan sa tanang nagpadayon sa ginadiling buhat nga e-undang na nila kini tungod kay disedidong siyang tumanon ang mandatu ni Pangulong Rodrigo Duterte.
Nasayrang nadakpan ang suspendidong kagawad sa niaging alas 10:30 sa gabii diin nakuhaan kini ug 6 ka sachet nga dunay sulod sa gitoohang shabu. (Rolan Janea)
