BUTUAN CITY – Ubay-ubay nga mga bala, eksplosibo, bomb-making devices og gamit sa mga rebeldeng New People’s Army ang narekober sa kasundaluhan atol sa gilusad nilang clearing operations kaganinang buntag human ang engkwentro kagahapon batuk sa gibana-banang 30 ka mga rebeldeng New People’s Army kon NPA nga gitu-uhang mga sakop sa Guerilla Front Committee 30 ilalom kang alyas Nicko.
Sigon ni Captain Francisco Garello Jr, Civil Military Operations kon CMO Officer, natigayon ang engkwentro kagahapon sa alas-singko sa hapon sa Sitio Himat-e, Brgy. Cayale, lungsod Tago, Surigao del Sur nga milungtad og 30 minutos.
Apil sa narekober gikan sa encounter site ang usa ka landmine, 7 pito ka mga blasting caps, usa ka ICOM radio na duna’y battery, mga bala sa AK47 rifle, og medical kit apil na ang duha ka mga backpacks nga duna’y sulod nga mga personal nga gamit kansa gipangbiyaan sa nanibat nga mga rebelde.
Gipaneguro ni Cpt. Garello nga kontrolado na ang sitwasyon sa maong lugar dungan sa pagbutyag nga ipadayon nila ang pagpalig-on sa security measures og himuon ang ilang mandato aron maprotektahan ang kaluwasan og seguridad ang mga sibilyan batuk sa mga lawless elements.
Nasayrang wala’y na-angol nga sibilyan o kaha mga membro sa 36th IB, Philippine Army atol sa maong engkwentro. (Beth Ruiz)
