BUTUAN CITY – Nanghinaot ang mga kabanay sa usa ka Indian national nga makalingkawas kini gikan sa gipasangil nga salaud human nakuhaan og CCTV footage ang iyang pagsulod sa usa ka hotel og ang naka-uban niining dalaga kinsa mi-akusa kaniyang nanglugos.
Nasayrang tungod sa kaminos sa kahibalong musulti og pinulungang Ingles o kaha Filipino, wala na mutubag pa si Krushpreet Singh Sidhu, 23-anyos, ulitawo og nagpuyo sa Brgy. Villa Kananga ning siyudad, sa reklamo sa inahan sa gika-uban niyang dalaga nga iya kining gilugos.
Nasayrang kaganinang ala-una sa kaadlawon, nasapon sa inahan ang dalaga sulod sa usa ka lawak ka-uban ang maong Indian national.
Unang gisaysay sa dalaga ngadto sa iyang inahan nga gipugos matud pa siya sa lalaki pagpasulod sa maong hotel apan dihang gi-review na ang CCTV footage, dinhi nasuta nga mismong ang dalaga ang unang misulod sa hotel room.
Bisan pa man, gipadetine gihapon sa inahan ang suspek tungod sa iyang kapursigidong kasuhan kini og pagpanglugos. (Beth Ruiz)
