BUTUAN CITY – Nakit-an nalang nga nagbitay sa sanga sa kahoy ug wala nay kinabuhi ang gidudahang suspetsado sa pagpanglugos sa iya ra usab nga pag-omangkon sa may Barangay Tabon-tabon, Sibagat, Agusan Del Sur.
Sa impormasyong nakuha ning sibyahan sa pakighinabi kang PO3 Francis Sahay sa Sibagat Municipal Police Station, gibutyag niini nga mga bandang alas 6:00 sa niaging buntag, nakit-an sa iyang silingan nga nagbitay sa sanga sa kahoy ang biktima nga si Freddie Langcuyan Lanada, 57-anyos, usa ka balo nga mag-uuma ug residente sa Purok-12 sa maong barangay.
Giklaro pa ni PO3 Sahay nga patay na ang biktima sa dihang miresponde sila sa gipaabot nga taho sa ilang buhatan.
Nagtubok matud pa ang biktima gamit ang bagon nga gihikot sa iyang le-og ug sa sanga sa kahoy.
Sa gihimung imbestigasyon sa kapulisan, ang nasangpit nga biktima ang gitudlong maoy naglugos matud pa sa iya ra usab nga pag-omangkon pipila lang ka adlaw ang nakalabay adiser ang panghitabo.
Posible matud pang na-konsensiya ang biktima hinungdang nakahimu kini sa pagpakamatay. (Rolan Janea)
