BUTUAN CITY – Misangpot sa pagkasikop sa tulo ka suspetsado ang gihimung simultaneous nga pag-implementa sa search warrant kagahapong adlawa sa Bayugan City, Agusan Del Sur.
Sigon ni P/ Supt. Romeo Villalobos Jr, Chief of Police sa Bayugan City Police Station sa unang search warrant, nadakpan ang mga suspetsado nga sila Jegger Curayag ug JongJong Almeria sa may P-6 Brgy Poblacion sa maong siyudad diin nakuhaan ug usa ka gitoohang shabu nga dunay kabug-aton nga 13.0 gramos nga nagkantidad ug 153-mil pesos og uban pang mga illegal drug paraphernalia’s.
Ang mga nadakpan nga mga suspek ang apil sa illegal Drug Watch list. Samtang sa ikaduhang search warrant sa samang lugar, nadakpan ang subject nga si Rodrigo Paloma Jr, alyas Budok, 36-anyos ug menyu.
Nakumpiska sa posisyon sa suspetsado ang 3 ka sachet sa gidudahang shabu nga dunay kabug-atong 14 gramos ug market value nga 165-mil pesos.
Ang dinakpang mga suspek gikustudiya na sa Bayugan City Police Station alang sa tukmang disposasyon.
Alayon niini, gipasegarbo ni P/ Supt. Villalobos nga limited na ang illegal nga drugas sa siyudad ug ang maong operasyon isolated na lang diin duna gihapoy wala nahadlok nga mibalik sa pagpayuhot sa ginadiling drugas.
