BUTUAN CITY – Pabiling gawasnon ang rehiyon sa Caraga sa Bird Flu Virus. Kini ang gipamugos ni Emilou Presilda-tigpamaba sa Department of Agriculture kon DA-Caraga sa pakighinabi ning sibyahan.
Kini bisan paman nga sa sunod semana pa mogawas ang resulta sa laboratory test nga gihimu sa sample sa mga namatay nga pato sa Barangay Holy Redeemer ug sa mga manok pangtari sa usa ka farm sa Brgy. Villa Kananga ning dakbayan sa Butuan.
Sigon ni Presilda, base sa gipagawas nga inisyal nga pamahayag sa mga eksperto ug veterinarian, wala silay nakitang simtomas sa bird flu virus nga posibling hinungdan sa kamatay nga nahitabo.
Ang gihimu matud pang laboratory test aron lang makumpirma kung unsa nga sakit ang mi-igo sa mga namatay nga hayop.
Gipasabot usab niini nga ang bird flu virus dili lang kalit nga mubutho sa usa ka lugar kundili dunay magdala niini.
Sa gihimung pakisusi, wala matud pay kontak sa ubang hayop ang mga namatay nga pato ug manok pangtari rason usab sa lig-on nilang assesment nga dili bird flu virus ang mi-igo sa mga niini.
Alayon niini gitin-aw sa opisyal nga luwas nga kaonon ang mga produktong manok nga gibaligya sa rehiyon.
