BUTUAN CITY – Pabiling nahadlok ang mga Pinoy sa Barcelona, Spain tungod sa nahitabong terroristang pagpangatake.
Sigon ni Eldy Caldoza, nga taga Buenavista, Agusan Del Norte ug karun nanimuyo na sa Espanya, dili sila mag-gawas-gawas sa ilang panimalay ilabina kay gitaho sa kapulisan nga posibling unom ka pag-atake ang himoon sa terorista diin tulo na matud pa niini ang nahitabo.
Sumala pa ni Caldoza sa eksklusibong pakighinabi sa Bombo Radyo, mibalik na sa normal ang Las Ramblas, diin nahitabo ang unan pag-atake apan dili na kaayu daghan ang mga tawo nga maglakaw-lakaw.
Gi-isa usab sa pinakataas nga alerto ang seguridad sa maong dapit. Gipahayag ni Caldoza nga usa ka malinawong lugar ang Las Ramblas ug kanunay nga puno sa tawo.
Maayo nalang matud pa kay gamay nga van ang gigamit sa mga terorista sa pag-atake hinungdan dili kaayo daghan ang nakalas nga kinabuhi. Gidayeg usab ni Caldoza ang maayong taktika sa otoridad aron maluwas ang nagpanic nga katawhan ug madakpan ang responsable.
Sigon pa niini, gipasulod ang mga tawo sa mga establishemento sama nalang sa bar, restaurant, mall ug simbahan, adiser kini gipasira.
Na-trap matud pa ang mga tawo ug mga lima ka oras samtang gi-kontrola pa ang lugar diin duna nay nadakpang mga suspetsado.
Gikatingala usab ni Caldoza ang maong panghitabo tungod kay kanunay’ng matud pa nga hugot ang seguridad sa maong dapit.
Sa matag kanto duna matud pay pulis gawas pa sa daghang nagkatag nga intelligence. Gane, kung dunay magbuhat ug salaod, duha ka minuto palang madakpan na. (Rolan Janea)
