BUTUAN CITY – Nagpadayag og pagkadiskmaya ang liderato sa 36th IB, Philippine Army sa paggamit og mga landmines sa mga rebeldeng New People’s Army kon NPA nga miresulta sa pagkamatay sa usa ka army corporal human ang ilang engkwentro sa may Sitio Buringon, Brgy. Mahaba sa lungsod sa Marihatag, lalawigan sa Surigao del Sur.
Sigon ni Capt. Anthony Pueblas, tigpamaba sa 36th IB, PA, napatay sa 40-minutong engkwentro si Corporal Jarem Rex Digno sa 7th Special Forces Company dihang ilang na-engkwentro ang gibana-banang 30 aka mga miyembro sa Guerilla Front Committee 19 sa New People’s Army (NPA).
Natigayon ang engkwentro human gigukod sa mga sundalo ang nanibat nga mga rebelde nga una nang mibanhig sa usa ka civilian truck nga miresulta sa pagka-angol sa duha ka mga sibilyan.
Gipakisayran pa usab sa tropa sa kagamhanan kung duna ba’y casualty sa panig sa mga rebelde tungod sa mga lama sa dugo nga anaa sa encounter site. (Beth Ruiz)
