BUTUAN CITY – Paningkamutan sa Department of Agriculture kon DA Caraga Region nga magpabiling bird flu-free ang rehiyon taliwa nga na-contain na kini sa Luzon.
Sigon ni Emmylou Presilda, Chief Information Officer sa DA-Caraga, gi-activate na ang Avian Influenza Task Force aron makig-alayon sa mga provincial veterinary offices og sa Caraga Regional Animal Diseases Diagnostic Laboratory para sa hugot nga monitoring sa maong virus.
Mala-umon ang opisyal nga wala’y makalusot tungod sa pag-contain na niini sa kauluhan dungan sa iyang panawagan sa tanang mga Caraganons nga mahimong alerto sa tanang panahon og makig-alayon sa ilang buhatan higayong duna’y suspected case niini.
Nanawagan usab siya sa tanan nga makig-alayon kanila aron maprotektahan ang tibuok rehiyon batuk sa maong sakit bisan og duna na’y gipagawas nga Memorandum Circular ang Bureau of Animal Industry alang sa temporary ban sa pag-transport sa mga live domestic og wild poultry apil na sa ilang mga by-products sama sa karne, day-old chicks og ilang hugaw gikan sa Luzon padulong sa Visayas og Mindanao. (Beth Ruiz)
