BUTUAN CITY – Gikumpirma sa Mayor sa Bislig City, Surigao del Sur nga mag-host ang ilang siyudad ug upat ka mga international events karong Setyembre 2018.
Sigon ni Bislig City Mayor Librado Navarro mag-host ang dakbayan sa International Federation of Organic Agriculture Movement (IFOAM), International Organic Forum, First Declaration of Asian Organic Day, ug the Asian Local Government for Organic Agriculture (ALGOA) Summit sa Setyembre sunod tuig.
Kung mahinumduman, si Mayor Navarro ang usa sa mga partisipante sa ALGOA Summit niadtong Setyembre 27 ngadto Oktubre 1, 2016, kangsa gitambongan usab sa mga representate sa Korea, Japan, ug Indonesia.
Atol sa maong kalihukan, gipirmahan niini ang Memorandum of Understanding sa pagpalambo sa Organic Agriculture sa Goesan County, Chungbuk Province sa Korea.
Mi-apela nalang si Navarro sa tanang Bisliganons ug suporta ug tabang sa lokal nga kagamhanan aron sa ingon makab-ot ang tinguha nga mahimong “Model City for Organic Agriculture in the Philippines by 2020.
Lakip sa mga prayoridad sa mga programa sa administration ang pagpalambo sa ekonomiya, paglusad sa Operation 911, basic social services, environmental protection, infrastructure, ug pagpalambo sa Bislig core values of Integrity, Courage, Resiliency, Accountability ug Sustainability. (Beth Ruiz)
