BUTUAN CITY – Nahimong kabahin ang Bislig City, ang bugtong siyudad nga mirepresentar sa entiro Caraga Region, sa ASEAN’s landmark lighting karong tuiga.
Gihimo ang switching on sa landmark light kagabii sa Herculano Basañez Boulevard kon Baywalk ubos sa temang “Under one light we are one ASEAN.”
Subay sa paghandom sa ika-50 nga founding anniversary sa Association of Southeast Asian Nations kon ASEAN, tumong sa maong kalihukan ang pagpataas sa legel sa kahibalo sa publiko kalabot sa kamahinungdanon og mga benepisyo sa ASEAN community.
Ang maong kasa-ulugan dungan nga gipahigayon sa mga capitals sa ASEAN member states sama sa Philippines, Indonesia, Thailand, Singapore, Vietnam, Cambodia, Myanmar, Laos, Malaysia, og Brunei, og gisalmutan sa 50 ka mga nag-unang siyudad sa Pilipinas nga duna’y makasaysayanong landmarks nga gipili sa Department of Interior and Local Government kon DILG.
Gisugdan ang maong programa sa pagpatingog sa kusog nga sirena sa “Pamukaw” kagahapon sa alas-singko sa sayong buntag sa may Brgy. Mangagoy og Poblacion.
Gisundan kini sa “Kanami Hinang Art Exhibits” sa ala-una sa hapon kondiin gipresenta ang managlahing interesting arts sa maong siyudad.
Pagka-alas tres sa hapon, gihimo ang “Pakuga sa Dakbayan” motorcade palibot sa mga Brgy. Poblacion, Mangagoy, og Tabon.
Anaa pa ang “Pabibo Lyre Band Exhibition” nga gihimo kagahapon sa alas-4:30 sa hapon kondiin gi-showcase ang nindot nga performance sa mga lyre bands.
Sa alas-singko sa hapon, gihimo ang “Pasundayag” og “Kawadang sa Karsada” og dayon sa lighting ceremony pagka-alas siete kagabii nga gipangunahan sa mga tag-as nga opisyal sa lalawigan.
Gitapos ang maong kasa-ulugan pagka-alas 7:30 kagabii pinaagi sa “Pasiga Fireworks Display, Pabibo Dance og Music Concert” nga naghatag og lingaw sa katawhan. (Beth Ruiz)
