BUTUAN CITY – Nagpatawag ug usa ka special meeting ang executive judge sa Regional Trial Court ning syudad sa Butuan kagahapong adlawa aron nga mahisgutan ang ilang seguridad human ang nahitabong pagpusil-patay kang Judge Godofredo Abul Jr. ning nakalabay’ng adlaw.
Sa pakighinabi ning sibyahan, gibutyag ni Executive Judge Emmanuel Escatron sa RTC, 10th Judicial Region, Hall of Justice ning syudad nga subay sa nahitabo sa ilang kaubanan, nagpatawag kini ug meeting ngadto sa tanang mga judges, branch clerk of court, ug mga fiscal sa RTC aron nga hisgutan ang mga angayang buhaton sa ingon dili na masubli pa ang nahitabo kang Judge Abul.
Sigon niini, nga ila matud pang nasabutan ang pagpahugot pa sa seguridad sa ilang lugar-trabahoanan lakip na ang personal nga seguridad sa matag usa.
Human matud pa sa ilang panagsabot, iya gilayong gipaabot ngadto sa mga kapulisan ning syudad ang mga sentimento sa iyang mga kaubanan mahitungod sa hisgutanang pang-seguridad dungan sa panghangyo ngadto kanila ug sa uban pang mga ahensya nga ma-secure ang ilang kaugalingon.
Gidugang usab niini nga welcome matud pa alang kanila ang pagmugna ug usa ka special investigation task group sa kapulisan nga maoy mututok sa pagsulbad sa kaso sa pagpatay kang Judge Abul.
Apan sa karon, nakatutok una sila sa paghatag ug tabang alang sa pagpahiluna sa patay’ng lawas sa ilang kaubanan. (Rolan Janea)
