UTUAN CITY – Gisugdan na sa Commission on Elections kon COMELEC – Cabadbaran City ang beripikasyon kung tinuod nga mga botante sa ilang siyudad ang mga petitioners nga mipirma sa gidusong petition to recall kang Mayor Katrina Marie Mortola nga gisuportahan ni Agusan del Norte Governor Ma. Angelica Rosedell Amante-Matba.
Sa pakighinabi ning sibyahan, gikumpirma sa opisyal nga na-apas kagahapon sa mga petitioners ang gamay’ng kulang sa mga gikinahanglang rekisitos sa ilang buhatan hinungdan sa hingpit nga pagka-file niini.
Gikan sa pagduso sa maong petisyon kagahapon, duna sila’y tulo ka adlaw nga tagal aron tapuson kini kondiin apil sa ilang i-verify kung ang ihap sa mga namirmang petitioners, naka-abot ba sa gi-require nga porsiento aron mapahigayon ang recall election.
Gani, dali nilang gidala ngadto sa COMELEC provincial office ang maong petition papers aron matabangan sila sa himuong beripikasyon sa ingon ilang ma-apas ang tulo ka adlaw nga deadline na gitakda sa election law.
Human sa beripikasyon, ila gilayong ipadala ang maong mga papeles ngadto sa Office of the Deputy Executive Director for Operations kon ODEDO sa COMELEC-Central Office.
Sila na matud pa ang magdetermina kung ang petisyon, sufficient in form and substance og ang ODEDO na ang mag-endorso sa petisyon ngadto sa COMELEC en banc uban sa notisya niini sa pagpadayon sa maong petisyon. (Beth Ruiz)
