BUTUAN CITY – Hingpit nang nahaon ang petition for recall sa mayor nga posisyon sa Cabadbaran City, sakop sa Agusan Del Norte, ngadto sa Comelec, kagahapong adlawa.
Nahimong alegre pa ang maong lakang human nagtapok ang mga suporters ni Agusan Del Norte Governor Maria Angelica Rosedell Amante Matba ug Judy Amante ang kanhe asawa ni Congressman Erlpe Amante, ug duna pay banda diha mismo sa compound sa Cabadbaran City Hall.
Base sa impormasyong nakuha sa Bombo Radyo, na-abot matud pa sa kampo sa petitioner ang pagtugot sa 20 porsiento sa kinatibuk-ang botante sa maong siyudad, kansa maoy gikinahanglan aron makaduso ug petition for recall.
Sa pakighinabi ning sibyahan kang Gobernadora Matba kansa personal nga mi-tambong sa pagduso sa maong petition, nga ang nag-unang basehan sa ilang gihimung lakang mao ang napapas nga pagsalig sa katawhan sa Cabadbaran ngadto kang Mayor Katrina Mortola.
Gitawag pa niini nga peke ang paglingkod isip mayor ni Mortola tungod kay diktaran raman gihapon kini ni Congressman Erlpe Amante diha sa pagdumala sa siyudad. Wala matud pay rason nga magpabilin si Mayor Mortola sa maong posisyon dungan sa pagtawag niini nga usa ka shadow mayor.
Gipanawagan nalang niini ang tanang katawhan sa Cabadbaran nga maghiusa ug dili na magpa-ilad pa sa ikaduhang tsan-sa sa pagpili ug mayor sa dakbayan.
Apan ang maong lakang gikapalagan ni Board Member Loreto Maragañas. Sumala pa niini, na-init siya namati nga samtang sila nga mga SP Member nga taga Cabadbaran, naningkamot sa pagtambong sa sesyon kagahapong adlawa diha sa provincial capitol, ang iyang mga kaubanan nga dili botante sa dakbayan, nag-apil-apil na hinoon sa maong aktibidad.
Gibatikos usab ni Maragañas ang gihaong petition for recall dungan sa pangutana, nganong dili hulaton ang sunod nga election.
