BUTUAN CITY – Gimando na ni Police Regional Office kon PRO-13 regional director Chief Supt. Rolando Felix ang paglusad og pursuit operations batuk sa mga responsable pagpusil patay kang Judge Godofredo Abul Jr., presiding judge sa Regional Trial Court, Branch 4, Hall of Justice nga nakabase sa Brgy. Libertad ning siyudad.
Sigon ni P/Supt. Martin Gamba, information officer sa PRO-13, gimando na usab ni General Felix ang pagmugna og investigating body aron mutabang sa mga sakop sa Butuan City Police Station 4 sa ilang imbestigasyon.
Alang sa daling ikasulbad sa maong kremin, nanawagan ang opisyal ngadto sa tanang katawhan nga makig-alayon gilayon sa pinakaduol nga buhatan sa kapulisan higayong duna’y makuhang impormasyon kalabot sa mga suspek.
Mamahimo usab nga ipa-abot kini dinhi sa Bombo Radyo isip tabang na usab sa paghatag og hustisya sa nadangatan sa mga biktima. Dili matud pa makatugot ang PRO-13 nga ma-intimidate sa mga kreminal ang mga huwis ning rehiyon. (Beth Ruiz)
