BUTUAN CITY – Gibana-banang mukabat sa 400 ka mga trabahante sa Stanfilco, usa ka division sa Dole Philippines ang ma-apektuhan sa pagsira na sa ilang operasyon tungod sa sunod-sunod nga pagpangatake sa mga rebeldeng New People’s Army sa property sa maong kompanya.
Ma-apektuhan usab sa pagsira sa ilang operasyon ang 5-mil ka mga dependents sa maong mga trabahante.
Sigon sa management sa maong kompanya, magsira ang Stanfilco karong Agusto 9 tungod sa wala’y kaluy nga pagpangatake sa mga rebeldeng NPA.
Dugang pa sa Stanfilco, aktibo usab nga gi-harass sa mga rebelde ang nilang mga company personnel og gipangguba ang ilang mga assets sukad pa ning nakalabay’ng mga tuig nga miresulta sa dakong alkansi sa maong premier banana exporter.
Bisan og gi-angkon na sa mga rebeldeng NPA sa nakalabay’ng mga interview sa Bombo Radyo Butuan nga sila ang responsable sa maong pagpangatake apan ilang gipanghimakak nga ang wala pagbayad sa kompanya og “revolutionary tax” ang hinungdan niini. (Beth Ruiz)
