CSU member ug lider sa Nagkahiusang Mag-uuma sa Surigao del Norte, gibanhigan-patay sa Riding-in-Tandem
BUTUAN CITY – Gikonsidera ni P/ Insp. Roan Belarmino, Hepe sa Alegria Municipal Police Station ang tanang ang-gulo sa pagpamusil-patay sa usa ka Civil Security Unit kon CSU member ug lider sa Nagkahiusang Mag-uuma sa Surigao del Norte sa niaging alauna sa hapon sa may national highway, Purok-1, Poblacion, Alegria sa maong probinsiya.
Giila sa Hepe ang biktimang si Emiliton Katampongan, 60-anyos, miyembro sa CSU sa maong lungsod ug residente sa P-4, Barangay Anahaw, Alegria.
Sumala pa niini sa pakighinabi ning sibyahan, gikan pa sa duty sa may merkado publiko sa maong dapit ang biktima ug duna lay gipalit sa tindahan sa dihang nahitabo ang pagpamusil.
Gisundan kini sa duha ka suspetsado nga nakasakay sa single motor, kolor pula ug tungod kay parehong nakahelmet, wala kini nailhan.
Tulo ka mga bala ang nilubong sa nagkadaiyang parte sa lawas sa biktima nga maoy hinungdan sa iyang hinanaling kamatayon.
Pagtumbok pa sa opisyal, daghang motibo karun ang ilang gisundan aron mailhan ang mga suspetsado.
Sa kasamtangan, gipahiluna na ang patay’ng lawas sa biktima sa iyang pinuy-anan samtang ang lokal nga kagamhanan sa Alegria, desididong matumbok ang responsable nga daling nisibat sa wala matinong direksiyun human sa maong insedente.
