BUTUAN CITY – Gikumpirma sa liderato sa 402nd Brigade, PA ang pagkadagit sa tulo ka mga cafgu member didto sa Brgy. Bitaogan, sakop sa lungsod sa San Miguel, Surigao del Sur.
Sa pakighinabi ning sibyahan, gibutyag ni Col. Franco Gacal, commander sa 402nd Brigade, nga managsunod matud pang gipangdagit ang mga biktima diha mismo sa ilang mga pinuy-anan.
Sigon niini nga niadtong Hulyo 7 sa alas- 11 ang takna sa gabie, gidagit sila Cafgu Mama Abao ug Cafgu Aljun Minano samtang pagka-alas 4 ang takna sa kadlawon pagka-sunod adlaw, gidagit usab si Cafgu Jerrick Quilano.
Matud pa nga na-assigned ang mga niini sa Bitaogan Patrol Base ug parehong mga naka-off duty sa dihang gidagit kini sa gibana-banang 20 ngadto sa 25 ka mga armadong indibidwal kangsa gituohang mga sakop sa Guerilla Front Committee 19 sa New People’s Army.
Gidugang pa niini nga sa karon nagpadayon pa ang ilang pagpaningkamot aron nga makit-an ug marekober ang nasangpit nga mga biktima.
Wala pa usab sila’y nadawat nga komunikasyon gikan sa walhong grupo mahitungod sa pagkadagit sa mga nahisgutan.
Hinuon ilang gilauman nga mu-kontak ra usab ang mga niini ngadto sa mga pamilya sa mga biktima alang sa pagpasibaw sa ilang mga demanda. (Mon Aplaya)
