BUTUAN CITY – Mi-abot sa kinatibuk-ang 2-mil, 976 ka mga indibidwal ang natunulan og nagkada-iyang serbisyo atol sa Bombo Medico 2017 kagahapon nga gipahigayon sa covered court sa Provincial Capitol sa Capitol Compound ning siyudad sa Butuan.
Sa maong ihap, 398 ang nakapakunsulta sa internal medicine, 328 ang naka-avail sa libreng eye glasses, 241 ka mga bata ang nakunsulta sa pedia, 129 ang naka-avail sa pagpakunsulta sa pulmonary, 84 sa cardio, 56 sa ENT kon ear, nose and throat, 50 ang napa-ilalom sa prostate screening, og laing 50 sa urine analysis, 65 ang napa-ilalom usa sa cyst screening.
Sa maong kalihukan, tumang kalipay ang gibati sa pito ka mga indibidwal nga libreng na-operahan sa ilang cyst nga kung diha sa ospital gihimo, mugasto unta sila og 50-mil pesos.
Gawas niini mu-abot usab sa usa ka gatus ang na-ibtan sa ilang daut nga ngipon, lima ang nakadawat sa libreng sungkod og laing lima sa libreng crutches.
Samtang sa grooming, 42 ang libreng natupihan, 248 ang namasahe nga libre samtang mi-abot usab sa usa ka libo ang naka-avail sa libreng feeding og 120 ka mga bata ang nakakaon og ice cream.
Samtang sa pinaka-unang higayon, mihatag usab sa ilang libreng legal nga serbisyo ang pipila ka mga abogado gikan sa usa ka pribadong unibersidad ning siyudad kondiin miabot sa 34 ka mga indibidwa ang ilang nahatagan og libreng legal opinion unta mabayran og tag-300 pesos matag-30 minutos. (Beth Ruiz)
