BUTUAN CITY – Miadtu na sa siyudad sa Marawi ang usa ka punerarya nga nakabase sa Iligan City aron mo-atiman sa mga marekober nga patay’ng lawas sa nagpadayong kagubot sa maong dakbayan.
Sigon ni Jun Pantoa, Information Officer sa Iligan City Government, lisud nang dalhon pa sa Iligan City ang makuhang patay’ng lawas gikan sa Marawi ilabina kung baho na kini, rasong nagkasinabot ang lokal nga kagamhanan sa Iligan, ug DSWD nga magpadala ug usa ka pribadong punerarya nga muadtu sa Marawi aron didto atimanon ang patay’ng lawas kauban ang SOCO.
Giklaro usab sa opisyal nga kinahanglang susihon ang mga patay-ng lawas sa SOCO adiser kini ilubong ugaling wala nay pamilya nga maka-claim niini.
Indibidwal usab ang paglubong niini og kon ugaling dunay mag-claim, ipailalom gelayon sa DNA Test.
Una nang ginadala sa Iligan City ang marekober nga patay’ng lawas sa dakbayan sa Marawi diin sa kinatibuk-an duna na silay 17 ka lawas nga nalubong.
Samtang hangtud sa pagkakarun, padayon ang pag-atiman sa dul-an 133-mil ka mga bakwit gikan sa Marawi City, ug nagpahiluna sa 5 ka mga evacuation centers sa maong siyudad. Lakip na usab nga gi-atiman ilabina sa higsutanang panglawas ang mga homebased nga mga bakwit.
Sumala pa ni Pantoa, dunay igong suplay sa pag-atiman sa mga apektadong indibidwal diin naay mga doktor nga kanunay nagmonitor sa panglawas ilabina sa mga bata ug mga tigulang.
Nanawagan nalang ang opisyal sa tanang katawhan sa Iligan City lakip na sa mga bakwit nga mokooperar sa paghatag ug seguridad.
Sigon pa niini, ugaling dunay mamatikdang kadudahan ug lihok gelayon kining itaho sa otoridad aron mahatagan ug aksiyun.
Kini ilabina kay nagka-bungkag-bungkag na ang lokal nga terorista ug bisan asa nalang kini mopadulong. (Rolan Janea)
