BUTUAN CITY – Ang house-keeping maoy dakong hagit sa unang usa ka tuig sa pagserbisyo ning siyudad ni Mayor Ronnie Vicente Lagnada.
Kini ang giklaro ni Paolo Gogo – tigpamaba sa Butuan City government dungan sa pagpasabot nga isip usa ka pribadong tawo kaniadto, lisod ang pagdumala sa mga tawo ilabina sa pagpadagan sa kagamhanan.
Ang pagsuhito matud pa sa pagpadagan sa kagamhanan maoy giseguro ni Mayor Lagnada aron maka-abot sa mga Butuanon ang ilang gikinahanglang serbisyo ilabina sa unang unom ka buwan sa iyang serbisyo.
Sunod nga prayuridad sa mayor ang investment promotion aron mapahimuslan sa katawhan og sa lokal nga kagamhanan ang mahatud diha sa panudlanan sa mga potensyal nga industriya ning siyudad sama sa turismo, agrikultura og mga serbisyo.
Aron makadani og mga investors, midalikyat ang mayor sa nagkada-iyang siyudad sa nasud og sa ubang kanasuran.
Gawas niini, naresolba usab sa mayor sulod sa usa ka tuig sa iyang serbisyo ang mga problemang gi-atubang sa mga Butuanon ilabina ang supply sa tubig.
Sigon ni Gogo, naka-program na usab sa sunod tuig ang mga imontar nga proyektong imprastraktura ilabina sa mga rural barangays nga duna’y dagkong abot sa umahan nga maghatag og dugang pundo sa panudlanan sa katawhan og sa lokal nga kagamhanan. (Beth Ruiz)
