BUTUAN CITY – Kasong alarm and scandal og trespassing ang gi-andam sa mga sakop sa Butuan City Police Station 3 batuk sa usa ka pulis nga nagpabuto sa iyang service firearms dihang misulod sa panimaly sa usa ka negosyante og nanglaparo pa dayong hulgang mupatay og misinggit pa nga usa siya ka Maute member.
Sigon sa imbestigador nga si PO2 Bernard Amora, nagkagubot ang mga residente sa Brgy. Lumbucan ning siyudad atol sa bisperas sa kapistahan sa ilang barangay kagahapon tungod sa gihimo sa maong pulis nga si PO2 Rogelio Fortun Montadas Jr., residente sa Phase 2, Emily Homes sa Brgy. Libertad ning siyudad og nadestino sa Butuan City Public Safety Company.
Sa ilang pagresponde, nasuta nga misulod matud pa ang maong pulis sa pinuy-anan sa negosyante og gitarang si Romuelda Montejo Mantis, 45-anyos, minyo og residente sa Purok 17 sa Brgy. Lumbucan.
Nakita sa maong pulis ang kostumer nga si Ryan Harold Amper, 29-anyos, ulitawo og residente sa Ochoa Avenue, Brgy. Holy Redeemer ning siyudad.
Giduol kini sa maong pulis og gilaparo dayong pabuto sa iyang 9mm service firearms nga isyu sa PNP nga duna pa’y 12 ka mga buhing bala og misinggit nga Maute member siya og andam matud pang mupatay.
Gipa-ilalom na sa ballistic examination ang armas nga gipabuto sa suspek apil na ang narekober nilang mga bala kansa maoy standard operating procedure kon SOP dungan sa pag-paraffin test sa suspek.
Mi-angkon matud pa kanila ang suspek nga mawala siya sa saktong paminsar higayong mahubog ilabina nga gikan pa siya namista sa laing barangay ning siyudad adiser midalikyat sa Brgy. Lumbucan. (Beth Ruiz)
