BUTUAN CITY – Gipasakaan na og patong-patong nga kaso sa kapulisan sa Socorro, Surigao del Norte ang usa ka sibilyang nagsuot og uniporme sa sundalo nga maoy hinungdan sa natigayong komosyon nga miresulta sa pagkamatay sa usa niya ka ka kabanay og pagka-angol sa duha ka mga sundalo.
Naila ang namatay nga si Bievenido Liquido Jr., lumad nga taga-Dapa sa susamang lalawigan og residente sa Davao City kinsa nagpatuong usa ka sundalo samtang ang mitahan nga nagpaka-aron ingnon usab nga sundalo nailang si Richard Makinano, residente sa Dapa, Surigao del Norte og midalikyat lang sa lungsod sa Socorro aron mamista.
Gibutyag ni P/Sr. Insp. Anghel Cadileña – hepe sa Socorro Municipal Police Station, mga kasong frustrated murder, usurpation of authority og illegal use of uniform ang ilang gi-inquest kagahapon sa provincial prosecutor’s office.
Nasayrang girespondihan sa ilang pwersa ang sumbong kalabot sa naka-uniporme og sundalong lalaki nga duna’y bitbit nga armas ning mi-aging alas-siete sa gabii sa Purok 1, Brgy. Pamusayngan sa maong lungsod.
Sa pagresponde, ilang na-agni ang nakasuot og uniporme sa sundalo nga si Makinano nga mu-uban sa ilang buhatan alang sa interogasyon.
Dinhi na matud pa misaka sa balay ang laing sibilyang si Liquido og mikanaog nga duna’y bitbit nga armas dayong pusil sa duha ka mga sundalong nakig-coordinate lang sa operasyon sa kapulisan hinungdan nga gipusil gilayon kini.
Parehong gidala ang tulo sa ospital apan wala na maka-abot pang buhi si Liquido samtang gi-operahan usab ang mga sundalo hinungdan nga anaa na sa luwas nga kahimtang.
Narekober nila ang kalibre 45 nga pistolang gigamit sa suspek uban sa 16 ka mga buhing bala og unom ka basiyo uban sa usa ka magazine sa susamang armas. (Beth Ruiz)
