BUTUAN CITY – Narekober sa tropa sa kasundaluhan ang na-agnas nang patay’ng lawas sa gitoohang usa ka miyembro sa New People’s Army kon NPA sa Purok-4, Sitio Lago, Brgy. Carromata, San Miguel, Surigao del Sur.
Base sa inisyal nga taho gikan sa San Miguel Municipal Police Station, narekober ang patay’ng lawas sa bukirang parte sa Barangay Carromata ug positibong giila sa personahe sa 16th SF intelligence nga si Aljun Agustin nga nailang “Ian,” usa ka miyembro sa NPA Guerilla Front 21A nga nag-operate sa lungsod sa San Miguel ug Sibagat, sa Agusan del Sur.
Sa pakighinabi kang 16th SF Company CMO officer 1Lt. Michael Clemente, gibutyag niini nga gitoohang nasamdan ang maong rebelde unya namatay atol sa engkwentro nga natigayon niadtong Mayo 31 ug Hunyo 1, 2017, sa bisinidad sa Sitio Kiskis, Barangay Siagao, sa maong dapit.
Samtang gipahayag usab ni 402nd Brigade Commander Col. Franco Nemesio Gacal nga malikayan unta ang kamatayon sa maong indibidwal kung na-riyalisar lang niini nga gigamit lang siya sa NPA kansa gipatoo nga hatagan kini ug maayong panginabuhi pinaagi sa gitawag nga ‘SUPAMIL’ kon Suporta sa Pamilya diin muabot sa 3-mil ngadto sa 5-mil ang madawat kada bulan.
Alayon niini, gipaneguro nalang sa opisyal nga padayun mubuhat ang 402nd Brigade sa mandatu nga pagprotekta sa katawhan ug kumunidad. (Rolan Janea)
