BUTUAN CITY – Nubenta porsiento na sa mga barangay sa Marawi City ang kontrolado na sa militar gawas lang sa upat ka mga barangay nga duna pa’y presensya sa mga Maute fighters.
Kini ang gikumpirma ni Abdul Ghani Alop sa Lanao del Sur Provincial Disaster Risk Reduction and Management Office kon PDRRMO sa eksklusibong pakighinabi ning sibyahan. Gibutyag sa opisyal nga wala pa makuha ang mga patay’ng lawas sa mga nabiktima sa giyera sa upat ka mga barangay tungod sa mga Maute snipers sa palibot niini.
Kagahapon duna sila’y ma-rescue nga mga sibilyan kinsa pila ka adlaw nang natanggong sa ilang gipangtaguan human nakakuha og kutay o contact gikan sa ilang nahimutangan.
Gipanghimakak usab ni Alop ang mikaylap nga balitang mi-abin na sa Maute ang mga Bangsamoro Islamic Freedom Fighters kon BIFF.
Sigon sa opisyal, lisod kining mahitabo tungod kay wala’y makasulod sa Marawi City tungod sa hugot nga pagbantay sa tropa sa kagamhanan.
Gani, kini usab matud pa ang hinungdan nga bisan pa man sa paglihok sa teroristang grupo, wala gihapon sila makagawas gikan sa maong siyudad. Sa susamang higayon, wala usa’y ayuda nga gipasulod sa maon g siyudad. (Beth Ruiz)
