BUTUAN CITY – Unom ka mga pribadong higher education institutions ning rehiyon ang nagpa-abot og request sa Commission on Higher Education kon CHED-Caraga aron magpataas sa ilang tuition fee.
Apan sigon ni Engr. Ramil Sanchez, usa sa maong mga tunghaan ang ilang gi-deny ang hangyo human nga wala maka-apas sa ilang gihatag nga timeline.
Tungod niini, ang gitugutan lang nga magpataas sa ilang tuition fee mao ang Agusan del Sur Colleges kon ADSCOsa Bayugan City, lalawigan sa Agusan del Sur, De la Salle Don Bosco College sa Brgy. Mangagoy sa Bislig City, Father Saturnino Urios University ning siyudad sa Butuan, Northern Mindanao College kon NORMI sa Cabadbaran City sa Agusan del Norte og ang STI College sa Surigao City.
Managlahing porsiento sa increase ang gipangayo sa maong mga tunghaan kondiin ang STI og FSUU nangayo og 5-porsiento, samtang 8-porsiento usab sa NORMI, 10-porsiento sa ADSCO og 12-porsiento sa Don Bosco.
Giklaro sa opisyal nga bisan og maka-apekto kini sa mga ginikanan apan mi-agi matud pa kini sa saktong proseso pinaagi sa gi-require nga konsultasyon niadtong Pebrero diin gipadayag sa maong mga tunghaan ang katuyuan sa ilang pagpataas sa balayrunon. (Beth Ruiz)
