BUTUAN CITY – Pasulod na karon sa final rounds ang 1st RCL 20-under Basketball Inter-Barangay tournament nga kabahin sa mga kalihukang gihan-ay sa lokal nga kagamhanan alang sa usa ka buwang pagsa-ulog sa Balangay Festival.
Gibutyag ni Konsehal Cromwel Nortega – chairman sa Committee on Sports sa Sangguniang Panlungsod, higayong matapos na ang maong torneo, ilang isunod ang 1st RCL Basketball Open Tournament alang niadtong mga hamtong na nga mahilig pang mudula sa maong sporting event.
Gikumpirma sa opisyal nga medyo malangay ang final rounds sa 1st RCL 20-under Basketball Inter-Barangay tournament tungod sa nadiskubrehan nga duna’y usa ka player nga migamit sa birth certificate sa iyang manghod kansa desisyunan pa sa technical committee.
Mahinumdumang mikampyon sa Inter-city Volleyball Tournament ang Ormoc City nga usa lang sa nakahan-ay nga mga kalihukan subay sa kapyistahan ning siyudad.
Sadya usab ang pagpahigayon sa 1st RCL Mountain Bike Open Competition sa Sitio Malalag, Brgy. Libertad nga gisalmutan sa mga bikers gikan sa nagkada-iyang lugar. (Beth Ruiz)
