BUTUAN CITY – Hugot nga gipasalamatan ni Butuan City og Agusan del Norte first district Rep. Lawrence Lemuel Fortun ang Bombo Radyo Butuan sa unang pagkuha sa balita kalabot sa pagdeklara ni Pangulong Rodrigo Duterte og martial law sa Mindanao.
Iyang gibutyag nga tungod usab sa pagpahibalo sa Bombo Radyo sa iyang buhatan kalabot sa kagubot sa Marawi City ilabina sa natanggong nga mga estudyante sa Mindanao State University on MSU-Marawi campus, nag-negotiate gilayon siya og mga sakyanan aron maoy musundo kanila sa ingon mapapa-uli sila dinhi sa Butuan og ubang lungsod sa Agusan del Norte.
Samtang subay sa nagtunhay karong balaud-militar, nanawagan ang opisyal ngadto sa tanan nga magpabiling magmakalmahon og dili angayang matarantar tungod kay gihimo sa mga otoridad ang tanan aron masulbad na ang kagubot nga hatud sa teroristang grupong Maute.
Dili matud pa magpadala sa mga posts sa social media nga maoy tuburan sa mga kahadlok dayong awhag nga maghulat sa mga kamanduang ipagawas sa mga otoridad aron dili makadugang sa kagubot og kahadlok sa katawhan. (Beth Ruiz)
