BUTUAN CITY – Gihimo kaganina ang grand opening sa 2017 “Bugsay” kon Paddle Mindanao sa nindot nga sea-spot sa Mabua stone beach area, atubangan sa Mount Bagarabon sa Surigao City.
Ang dakong kaihukan sa “Bugsay Mindanao IV, Paddle for Peace” nga gi-host sa city government sa Surigao, mag-showcase sa kulbahinam nga dragon boat competition kondiin ang mga competing teams gikan sa nagkada-iyang dapit sa nasud.
Ang kompetisyon nga mulungtad hangtud ugmang adlawa mag-ilog sa kinatibuk-ang ganti nga 200-mil pesos alang sa duha ka kategoriya – ang 2000 meters alang sa mixed men and women, og 200 meters alang gihapon sa mixed men and women.
Subay niini, mala-umon ang mga lokal nga opisyal nga 2017 “Bugsay” (Paddle) Mindanao national contest, maka-contribute sa gidamgong makab-ot ang idlas nga kalinaw kansa dugay nang gipangandoy sa mga Mindanaoans.
Pipila sa mga competing teams mao ang Saltwater Dragons nga gikan sa Tacloban City; Base Camp Dragon Boat Team, Dragons del Sur og Kampilan nga gikan sa Davao region; Liceo Dragonoids gikan sa Cagayan de Oro City og Team Bakunawa gikan sa Iligan City; San Luis Dragons sa Agusan del Sur, FSUU Blue Dragons sa Butuan City, og Bugsay Marajao sa Surigao City, Surigao del Norte. (Beth Ruiz)
