BUTUAN CITY – Nadugangan pa og usa ang natalang patay sa shootout tali sa mga otoridad ning siyudad sa Butuan og mga drug pushers ning mi-aging gabii sa Butuan City.
Namatay kagahapon sa hapon samtang anaa sa Agusan del Norte Provincial Hospital si Reneboy Gono nga taga-Brgy. Pasta, lungsod sa San Francisco, lalawigan sa Agusan del Sur.
Mahinumdumang na-interview pa sa Bombo Radyo sulod sa ospital ang suspek kondiin gireklamo niini ang wala gilayon pag-atiman sa medical staff kaniya rason nga nabati niini ang kahapdos nga igo sa mga bala diha sa iyang lawas.
Namatay ang suspek human naluya tungod sa inanay nga pagkawala sa iyang dugo.
Una nang namatay sa dugu-ong buy bust operation ning mi-aging alas 8:30 sa gabii sa national highway sa Km-6, Barangay Libertad, Butuan City ang main target nga si Reynaldo Aburdo, nga taga-San Isidro, Davao Del Norte og mi-angol usab ni Johnrey Caliwagan samtang at large pa gihapon ang usa pa nila ka ka-ubanang nakasibat.
Nakumpiska sa operasyon ang 9 ka mga sachets sa gidudahang shabu nga gibana-banang nagkantidad og 11-milyones pesos.
Apil sa nakuha ang 4 ka kalibre .45 nga pistola, unom ka mga magazines sa maong armas, 4 ka cellphones, weighing scale og wala’y sulod nga mga cellophanes. (Beth Ruiz)
