BUTUAN CITY – Malampusong nasakop ni Pinoy Aquaman Atty. Ingemar Macarine ang Hudson River sa New York pinaagi sa wala’y hunong nga paglangoy niya kagabii gikan sa Newburgh-Beacon Bridge ngadto sa Bannerman Island.
Milungtad sa usa ka oras og 49-minutos ang paglangoy sa swimming lawyer sa 8.4-kilometrong distansya sa suba.
Sa eksklusibong pakighinabi sa Bombo Radyo Butuan, gipadayag ni Macarine nga tumong sa iyang charity swim ang pag-promote sa iyang tibuok kinabuhing adbokasiya, ang pagbaton og limpyong kadagatan, kasubaan og kabaybayunan sa Pilipinas.
Kabahin usab kini sa iyang training sa iyang paglangoy sa English Channel karong Agusto 14.
Giklaro usab sa abogadong garbo sa mga Caraganons nga unta 10-kilometros ang gilay-on sa iyang langoyon apan mihangyo siyang putlon na lang tungod sa grabeng kabugnaw sa tubig nga mi-abot sa 57 Farenheit ang water temperature Hudson River nga ubanan pa sa 45 Farenheit nga temperatura sa hangin.
Nabag-uhan ang swimming lawyer sa air temperature ilabina nga na-anad siya paglangoy sa tropical waters sa Pilipinas.
Hinuon, nakatabang pagpa-init sa iyang lawas ang gisuot niyang wetsuit bisan og nagsamad kini sa iyang li-og og kili-kili.
Plano ni Macarine nga pagbalik niya sa nasud karong Hunyo, iyang balikan ang paglangoy sa kadagatan sa Camiguin Island human kini wala mahinayon niadtong Enero tungod sa daut nga panahon. (Beth Ruiz)
