BUTUAN CITY – Padayong suportahan sa kadumalahan sa Bureau of Fire Protection kon BFP-Surigao City ang ilang kaubanan nga nasapon sa anti-illegal drug operation sa PDEA-13 ug Surigao City Police Station sa niaging alas 9:30 sa buntag.
Sigon ni SFO4 Alberto Lerias, hepe sa BFP-Surigao City, hatagan gihapon nila ug suporta si FO2 Joseph Pejo, menyu, ug 10 ka tuig na sa serbiyu, sa atubangon niining mga kaso human nasapon sa otoridad.
Apan giklaro ni SFO4 Lerias nga ang balaod gihapon ang ipatunhay ug sundon.
Gipahayag nalang sa hepe nga nakurat siya sa pagkalambigit sa iyang tawo sa ilegal nga drugas dungan sa pagbutyag nga wala siya’y kahibalo niini.
Dako matud pa ang iyang katingala ilabina kay wala siya’y nakitang kadudahang lihok kang FO2 Pejo nga maayo matud pa sa panerbisyu.
Gane nalipay matud pa siya sa gihimung surprised drug test niadtong Oktubre sa nakalabay’ng tuig, diin ang nagnegatibo ang tanan.
Subay niini, nagpahimangno ang opisyal sa tanang katawan ilabina sa mga uniformed personnel nga likayan gayud ang illegal nga drugas, nga modaot sa kinabuhi sa tawo.
Nasayrang lakip sa nasikop sa maong operasyon ang municipal local government operation office sa San Isidro, Siargao Island nga si Richard Lasala. Sa kasamtangan, gikustudiya na ang mga nasikop sa indibidwal sa Surigao City Police Station.
