BUTUAN CITY – Girekomenda sa Office of the Ombudsman nga pasakaan si kanhi Butuan City Mayor Ferdinand Amante, Jr. og usa ka ihap sa kasong paglapas sa Section 3 sa Anti-Graft and Corrupt Practices Act ngadto sa Sandiganbayan.
Kini human nakita sa charge sheet nga niadtong Nobyembre 2012, gidawat ni Amante ang gidonar nga 2003 Mobile Siemens Biograph Duo Positron Emission Tomography-Computerized Tomography kon PET-CT scan machine gikan sa World Medical Relief, Inc. (WMRI).
Ang maong donasyon, gi-aprubahan sa Sangguniang Panlungsod human gitu-uhan nga ang incidental costs niini gamay lang kansa mu-abot sa kapin 1.5-milyunes pesos apan migawas nga dihang gi-transport na ang makina gikan sa Michigan, USA padulong nganhi sa Butuan kondiin migasto kini og 15-milyunes, 485-mil, 84-pesos og 12-sentabos sa customs duties, freight og ubang mga incidental fees.
Una nang gi-angkon ni Amante nga gidawat ang maong donasyon in good faith aron ma-equip ang Butuan City Medical Center sa revolutionary PET-CT scan machine, kansa usa ka state-of the-art diagnostic equipment alang sa mga sakit nga kanser.
Sa pag-abot sa maong makina niadtong Hunyo 2013, gipa-ilalom gilayon kini sa sunod-sunod nga mga tests og extensive measures, og dinhi nadiskubrehan ang problema sa iyang computer system sama sa pag-reformat o kaha pag-reinstall sa tanang software niini.
Sigon sa Commission on Audit, gikan niadtong tuig 2013 hangtud karon, pabiling wala magamit ang maong makina og na-expose na ngadto sa mga elemento nga naghatag na og kadaut niini hinungdan sa nag-usik lang kini sa pundo sa publiko.
Sa resolusyong gipagawas ni Ombudsman Conchita Carpio-Morales, dinhi nakalatid nga bisan og gidonar lang ang maong makina apan mas nakahatag og disbentaha ngadto sa gobyerno ang transaksyon niini, butang nga wala unta gipadayon sa respondent nga si Amante. (Beth Ruiz)
