BUTUAN CITY – Padayong kasuhan sa kapulisan sa Bayugan City sa lalawigan sa Agusan del Sur ang misibat nga amahang subject sa ilang anti-illegal drugs operation apan nakasibat.
Naila ang suspek nga si Ruel Salva samtang nadakpan usab ang anak niining si Markki Lowell Salva kinsa nakuhaan og 19-gramos nga suspected shabu og gibana-banang nagkantidad og 200-mil pesos.
Sigon ni P/Supt. Romeo Villalobos – hepe sa Bayugan City Police Office, nakuha usab gikan sa pinuy-anan sa misibat nga suspek ang gibana-banang 100-gramos nga gidudahang shabu nga nagkantidad og kapin sa usa ka milyon ka pesos.
Tungod sa kadaghan sa nakuhang shabu, dili matud pa mamahimong mupyansa niini ang mga suspek.
Nakuha usab gikan sa pinuy-anan ni Markki ang mga bala sa nagkada-iyang kalibre sa armas.
Giklaro sa opisyal nga mitahan na sa ilang buhatan si Markki ning mi-aging tuig dihang gipatuman ang Oplan Tokhang samtang wala sa ilang listahan ang misibat nga amahan tungod kay bag-o pa lang nila kining natumbok nga nagpayuhot og ginadiling druga. (Beth Ruiz)
